f s r
^

Ársins Róland

Heiðursløn verður árliga latin av nevndini í LGBT Føroyum fyri at heiðra minnið um Róland Samuelsen, sála. Heiðurslønin verður latin einum LGBTara, sum LGBT Føroyar metir, hevur givið eitt týdningarmikið og langt íkast til stríðið fyri javnbýtis rættindum til LGBTarar í Føroyum. Samstundis skal viðkomandi hava verið við til at varpa eitt jaligt ljós á LGBT føroyingar.

Og vinnarnir eru…

Bogi Davidsen (2011)

Nevndargrundgeving:

“Eins og Rólant var Bogi Davidsen ein av fyrstu føroyingum, ið alment stóðu fram sum samkynd. Í áttati- og nítiárunum stóð hann á odda fyri at bróta niður tabuið um samkynd og taliaði fyri politiskum javnrættindum í Føroyum. Sum yvirlækni í Danmark var hann eisini við til at veita læknaligan og sosialan stuðul til føroysk samkynd, ið fluttu niður vegna HIV-sjúkuna og lótu lív av eyðkvæmi í Danmark. LGBT Føroyar takkar Boga almikið fyri hansara lívslanga íkast til okkara felagsstríð fyri javnrætti. Tað er okkum ein heiður at fylgja í tínum fótasporum.”

(Eingin Róland heiðursløn varð latin av LGBT Føroyum í 2012 og 2013

Rasmus Rasnussen, sáli (2014)

Rasmus Rasmussen

Nevndargrundgeving:

“Uttan at vilja tað, gjørdist Rasmus Rasnussen, sáli, fyri nøkrum árum síðani miðdepil í stríðnum hjá LGBTarum í Føroyum, tí hann vegna sína kynsliga sannføring varð álopin. Hetta hevði stórar persónligar fylgjur fyri Rasmus og hansara nærmastu, men gjørdist eisini tað, sum endaliga slóðaði fyri, at fólk fyri fyrstu ferð í Føroya søgu vóru vard vegna sína kynsligu sannføring. Rasmus er farin, men ein litfagur varði stendir eftir hann. Tað vitnaðu vit aftur, tá ið hansara síðsti dreymur um, at eitt Fountain House varð sett á stovn í Føroyum, gjørdist veruleiki. Hóast lívið gjørdist alt ov stutt, so hevur henda friðarliga hetjan sett djúp og varandi spor eftir seg. Bæði í okkara minni, men eisini fyri okkara framtíð.”

Sofia M. J. Høgnesen (2015)

Nevndargrundgeving:

“Sofiu M. J. Høgnesen er fyrsti tvørkyndi føroyingur, ið alment hevur staðið fram sum tvørkyndur. Sofia er fyrsti tvørkyndi føroyingur, ið hevur sagt sína søgu alment á prent og í sjónvarpi. Sofia er fyrsti tvørkyndi føroyingur, hevur luttikið í føroyskari lýsingarherferð. Og Sofia er fyrsti tvørkyndi føroyingur, ið hevur kært persónligt álop í lesarabrøvum til Fjølmiðlakærunevnduna og fingið viðhald í síni kæru. Sofia hevur djarvt sagt frá síni persónligu ferð frá manni til kvinnu. Ein ferð, ið ikki enn er komin at enda. Sofia hevur somuleiðis barst fyri betri korum og viðgerðarmøguleikum fyri føroyskum tvørkyndum.”

Sonja J. Jógvansdóttir (2016)

Nevndargrundgeving:

“Eins og Róland var Sonja J. Jógvansdóttir ein av fyrstu føroyingum, ið alment stóðu fram sum samkynd. Hon er ein undangongukvinna og ein slóðbrótari. Hon hevur verið við til at seta tvær rørslur á stovn. Fyrst Friðarboðan og síðani LGBT Føroyar. Sum fyrsti opin samkyndur tinglimur, hevur hon uttan íhald bargt fyri m.a. at veita øllum føroyingum javnrættin at giftast borgarliga í Føroyum. Henda bargdað vann hon í ár. Hon hevur tó goldið ein dýran persónliga prís fyri hetta stríð, og LGBT Føroyar takkar tí Sonju J. Jógvansdóttir almikið fyri henara lívslanga íkast til okkara felagsstríð, og vónar, at hon heldur fram við hesum arbeiði.”

Eiler Fagraklett (2017)

Nevndargrundgeving:

“Hjá samkyndum føroyingum er torført at ímynda sær Føroyar uttan Eiler. Hann hevur í nógv ár ótroyttandi arbeitt til frama fyri javnrættindum hjá samkyndum, serliga í Føroyum. Eiler hevur mangan átikið sær støðuna sum talsmaður fyri LGBT Føroyar, men hetta er bert ein lítil brotpartur av øllum arbeiðnum, ið liggur aftan fyri at tryggja javnrættindi til føroyskar LGBTarar. Tað hevur mangan leikað hart á, og hóast Eiler hevur goldið ein dýran persónligan prís fyri alt sítt stríð, so hevur hann altíð staðið stinnur og funnið orkuna til at stríðast víðari fyri seg sjálvan og fyri okkum onnur. Hetta sóu vit best, tá ið Føroya Løgting eftir triðju viðgerð samtykti broytingar í hjúnabandslógini soleiðis, at samkynd kunnu giftast borgarliga í Føroyum. Hóast hetta er eitt mál, ið Eiler hevur verið ein stórur partur av og leingi hevur arbeitt fram ímóti, er Eiler beinanvegin klárur til næsta stríðið: at seta sálarligu heilsu- og trivnaðarkorini hjá føroyskum LGBTarum í miðdepilin. LGBT Føroyar takkar tí Eileri Fagraklett fyri hansara langa stríð til frama fyri einum javnrættari og rúmligari Føroyum. Eiler, tú ert ein av okkara hetjum.”

Share

Twitter Facebook Del.icio.us Digg LinkedIn StumbleUpon